التاريخ ديال الوداد
نادي الوداد الرياضي، لي معروف بالوداد البيضاوي ولا الوداد، واحد من أشهر وأعرق أندية المغرب. تأسس سنة 1937 في كازا، ومعروف بالمقاومة، الپاصيون والأمجاد.
النادي معروف بالألوان ديالو: الحمر والبيض. كايدخل ماتشاتو في ملعب محمد الخامس (دونور)، المعلب لي شهد علا بزاف ديال الماتشات والانجازات التاريخيا ديال الوداد.
الوداد تأسس علا يد مجموعا ديال المفكرين والمقاومين الشباب في عهد الاستعمار الفرنسي في المغرب سنة 1937، لي كان بينهم المرحوم محمد بنجلون. النادي بدا بفريق الواترپولو قبل مايصايب لپير جيڭو فرقة الكورة.
الفرقة دغيا دارت بلاصتها وفي ضرف 3 سنين طلعات لپروميير ديڢيزيون قبل ماتدي البطولة لي أول مرة عام 1948، و بقات كاتديها 4 سنين متابعة. في هاد الفترة، الوداد صيطرات علا الكرة في شمال افريقيا حيت دات 3 بطولات شمال افريقيا، 2 سوپركوپ شمال افريقيا وكأس شمال افريقيا.
في 1956، المغرب خدا استقلالو والوداد كان أول نادي تسجل عند الجامعة الملكية المغربية وباقي الماطريكول ديالو هووا الرقم 1. الوداد دات نفس داك العام كأس الاستقلال مورا ماربحات المغرب الأقصى نهار 9 ديصومبر، بيت ديال عبدالحق قدميري.
حتا لعام 1969، بقا الوداد كايدي البطولات (8) ولكن بلا مايدي حتا مرة كأس العرش، واخا لعب الفينال 4 ديال المرات. في 1957، الكأس تعطات لي مولودية وجدة واخا الماتش سالا ب 1-1 حيت المولودية لي ماركات اللولة في داك الماتش. نورمالمون، كان خاس الماتش اتعاود حسب القانون ديال ديك الوقيتة.
وفي موسم 1970/1969، كان الوداد تأهل لفينال ديال كأس العرش بعدما ربح حسنية أڭادير، الدفاع الحسني الجديدي والمغرب الفاسي. الدومي فينال ضد فاس، كانت قاصحة، سالا الماتش ب1-1 لي خلا الفراقي ايعاودو الماتش. وفي الماتش التاني، ربحات الوداد بزز ب1-0.
داك العام، الوداد كانت مستعدة لكولشي باش تدي الكأس خاصة الماتش كان ملعوب في دونور قدام الأعين ديال الملك الراحل الحسن التاني. وداكشي لي طرا حيت منين صفر الحكم نهاية الماتش، تهز دونور بالفرحة.
من بعد هاد الانتصار التاريخي، ربح الوداد 8 ديال الكؤوس لي خلا الراصيد ديالو في الكأس 9 ديال الألقاب. ولكن من 2001، ماقدرش الوداد إيدي الكأس واخا لعب 3 ديال فينالات، 2 منهم خصرهم بالپينالتيات.
بعدما دات الوداد العديد من الألقاب والكؤوس الوطنية والمغاربية، الطموح ديال النادي كبير وعدد الجماهير ديالو كترات بزاف، ماشي غير في كازا ولكن في المغرب والمغرب العربي كولو إلى درجة تسماو شي فراقي بسمية الوداد بحال وداد فاس ووداد تلمسان بالجزائر.
هاد الطموحات، خلات الوداد ينضم بزاف ديال الماتشات حبية ضد فرق عالمية. الوداد لعب حتا مع فراقي كبار في كأس محمد الخامس.
في أول ماتش ديال هاد الكأس، الوداد لعب ضد أتليتيكو مدريد وخسر بصعوبة 2-0. الوداد لعب ضد بزاف ديال الفرق فهاد المسابقة بحال صلوڢان براتسلاڢا، بايرن ميونيخ، ساو باولو، أكيلا، أندرليخت، سپورتينڭ لشبونة، المنتخب الروماني، إڢيرطون وموناكو.
الوداد لعب معا حتا فراقي إفريقية ولا مغربية بحال حافيا كوناكري، الجيش الملكي، الجمعية الرياضية جان دارك من داكار،وكانون ياوندي ضد من ربح الفينال ف1979.
الوداد كايبقا النادي الوحيد لي ربح كأس محمد الخامس من غير فراقي أوروپا وأمريكا اللاتينية طول المسابقة لي غبرات عام 1989.
بين عام 1989 و1993، الوداد عرف نجاحات كبار، دا البطولة 3 مرات، كأس العرش، صوپير كوپ داراب وأهم كأس لي هي اول كأس إفريقية للأندية البطلة (التشامپيونس ليڭ) ديال النادي. الوداد داها بعد ما ربح لالي في كازا ب 2-0 ضد الهلال السوداني وتعادل في الروتور في أم درمان ب 0-0.
هاد النجاحات كرمات خدمة ومجهودات سنين ديال المرحوم سي عبدالرزاق مكوار، رئيس الوداد من 1972 حتال 1993. سي مكوار اصتاطع بخدمتو إطور التسيير في الوداد وكان سبب باش تبدلات كرة في المغرب كامل.
من بين أهم الحوايج لي دار مكوار أنه اللعابا بداو كايتخلصو، وكان الوداد أول نادي في المغرب كايخلص اللعابا.
منين صالا هاد العام التاريخي، السي الرئيس وبزاف ديال اللعابا مشاو. منهم لي حتارف خارج المغرب، منهم لي عتازل، ومنهم لي مشا لفراقي أخرين في المغرب.
الوداد دخل في فترة تجديد، ومع تجديد، دخل الشك. في هاد الوقت، استافدات الرجاء من هاد الشك لي دخل فيه الوداد وهيمنات علا لبوطولة من 1996 تل 2001، وقدرات تدي التشامپيينس ليڭ في 1997 و 1999، بعدما انساجمات مع نادي الأولمبيك البيضاوي.
في هاد الفترة، الوداد اقدر يدي 4 كؤوس العرش، وكأس الكؤوس الإفريقية (لي ولات كأس الإتحاد الإفريقي)، بعدما ربح الفريق أسانتي كوتوكو في كازا ب 2-0 وخسر الروتور في كوماسي ب 2-1.
مورا هاد الفترة، بقا الوداد في فترة الشك وعدم استقرار حتا دا البطولة اللولا مورا 13 عام في 2005/2006، العام لي عرف تأسيس الألترا وينرز، لي ولات واحد من أفضل الألترات في العالم، وولاو داروريين في التيران وجزء من التاريخ ديال الوداد. في 2010، دا الوداد البطولة في أخر دورة مورا ماربح الفتح في كازا وخسرات الراجا معا الجيش في الرباط.
في 2014، شد الرئاسة ديال النادي سعيد الناصري، بعد فترة مقاطعة الجماهير للرئيس لي قبل منو عبد الإله أكرم، لي اضطر يستقل مورا مقاومة كبيرة باش يبقا في بلاستو، بدون جدوى.
عاون الرئيس سعيد الناصري بإعادة استقرار الوداد بفعل إدارة صارمة وفردية. ومع الوقت ارجع الوداد لبلاصتو كا واحد من رواد الكرة في افريقيا. من 2015، تمكن الوداد باش يدي البطولة 5 المرات، وماعمرو سالا مورا المركز التاني. وربح النادي 2 تشامپيينس ليڭ، اللولا مع الحسين عموتة، والتانية مع وليد الرڭراڭي، لي بفضل هاد الإنجاز ولا مدرب ديال المنتخب وتمكن يوصل معاه حتال دومي فينال ديال كأس العالم قطر 2022.
و القصة ماعمرها تسالي…
